Im Ougschte heimer mit üsem Theaterprojekt füre Jäner gstartet. I de erschte paar Lektione heimer vorauem Üebige gmacht, wo nis de speter im Theater söue häufe, wi zum Bischpiu ds Improvisiere. Nähr heimer agfange di einzelne Szene ds üebe. A dere Schteu sötti vilech no säge wär de "mir" überhoupt si. Das si d Loana Adam, d Sarah Wittwer, d Christa Stettler, d Andrea u d Linda Dubach, d Daniela Schenk, d Fabienne Schönholzer, d Ronja Rüegsegger u de no ig, dr Timo Kobel. Das unger dr Regie vom Thomas Häusler.

D Bühni iirichte heimer o müesse. Da chöimer immer Requisite vor Theatergruppe Signou bruuche. Härzleche Dank a dere Schteu. Chleider heimer natürlech ono brucht. Die heimer bim Trudi Wagner ds Langnou chönne uslehne. O a si e härzleche Dank.

Scho gli eis isches nähr Dezämber u du sogar Jäner worde. Bis zu de Uffüehrige isches nüm lang gange. U plötzlech si si da gsii! Di vier Täg, womer so lang ufse häregschaffet hei. Di 2 Houptprobe si guet über d Bühni gange, auso heimer eigetlech keinerlei Gründ gha närvös z si. Eigetlech! Ar Première simer aui sehr närvös gsi. Da heinis ou d Entschpannigsüebige vom Herr Häusler nüme chönne häufe.

Viu ds schnäu si di vier Täg du o scho ume düre gsi. I wett no am Fränzi, üsere Coiffeuse, danke für di tolle Frisure. Ono danke wetti am Simon Burkhalter, für das super Theater woner nis ume gschribe hett. Und last, but not least wetti ono üsne Liecht- u Tontechniker, em Dominic Keller u am Oliver Schüpbach, danke. Isch e super Ziit gsi mit öich!

Timo